انا المصرى....انا موش سعيد

ana mosh sa3eed...ana mosh happy

Thursday, September 08, 2005

الانتحابات....نعم..بالحاء!؟

استيقظت كالعاده مهموما.... اليوم 7/9/2005 ...اخ النهارده انتخابات صحيح....لا انتحابات العمل على قدم و ساق....احدى الشركات التى يعمل بها احد اقاربى زارنى بالامس و معه منشور غريب الشكل .... هى شركه قطاع عام..تفتق ذهن المسئولين فيها عن فكره اصدار منشور يمنع منعا باتا الاجازات طوال اسبوع الانتخابات....و الموجود بمهمه رسميه عليه العوده للشركه يوم الانتحابات للانتحاب و التصويت ... و استخدموا لفظا غريبا "الخوارج" اعتقدت اننا قد عدنا لايام سيدنا على ..كرم الله وجهه!؟ المهم اليكم صوره من المنشور المضحك المبكى





المهم...عالعاده استخدمت المترو للوصول الى العمل و وصلت...لفت نظرى احد اللافتات الاعلانيه الخاصه بأفتتاح مطعم فول و طعميه بجوار اللافتات التى لا حصر لها لمرشح بعينه بطول شارع القصر العينى..السخريه فى الموضوع ان كل اللافتات متجاوره .....صوره المرشح...و بجواره لافته المطعم.

المطعم اسمه البغل !!!!!!!!؟

المهم وصلت لمقر العمل و فوجئت بهرج و مرج..الناس تنزل تنتخب...او تنتحب...المهم مراكز الاقتراع تكون ممتلئه بالبشر .

حاضر يا افندم !!؟ طيب و البطاقات الانتخابيه ؟؟؟

لا احنا عاملين حسابنا...كل مجموعه يطلع معاها مندوب..يتأكد ان الموظفين انتحبوا... و صوتوا و للتسهيل على الموظفين... كل واحد معاه بطاقه فيها اسمه و اللجنه اللى سيتم فيها الانتخاب و رقمه فى كشوف الانتخابات !!!!؟

بس انا موش عامل بطاقه انتخابيه!؟

موش مهم!!!! اسمك موجود فى الكشف

طيب...موش طيب ولا نيله...ده اسمه تهريج....المهم ..لقيت اسمى و المندوب الخاص بى....و سلمنى البطاقه الجميله دى :

وجه البطاقه




ظهر البطاقه



عندئذ..... قررت تغيير منهجى من مقاطع للانتحابات الى مشارك و لكن بسلبيه...بمعنى عدم انتخاب احد من المرشحين ... ذهبت للجنه...موظفين الشركه متجمعين امامها و امن الشركه المحروسه بتاعتنا واقفين يساعدو الضباط و العساكر !؟ المهم..دخلت اللجنه متوجسا خيفه ان اخرج بفضيحه المزور...و تخيلت نفسى امام وكيل النيابه انطق...جبت البطاقه دى منين... و ازاى زورت اسمك فى كشوف الانتخابات .... و انت اصلا موش من المنطقه دى اصلا!؟
يا خفى الالطاف..نجنا مما نخاف..داخل يعنى داخل ان شاء الله .

اشرت باصابعى لمراقب اللجنه...2 فين؟

اتفضل هنا

بيد مرتعشه...ابرزت البطاقه المفروض انها لا تخصنى

الاسم ######

البطاقه الشخصيه

تمام..لو سمحت وقع هنا

وكمان الختامه دى بصباعك الكبير و ابصم مكان الامضاء !!؟؟

هوه ده الحبر السرى ؟؟ عجيب!؟

استلمت بطاقه التصويت...دخلت مكان معزول تم تصميمه من الالوميتال ...لمحت شخص واقف ورايا!!؟ كان مصوت دخل غلط..طب ياخى خبط قبل ما تخش !؟

مرت لحظه..و انا انظر للبطاقه....اختار حد.....لا...ولا واحد فيهم ينفع..انا حأختار مصر .

انا موش سعيد

2 Comments:

Post a Comment

<< Home